10.12.99: Ný fjarskiptalög
Samgönguráðherra hefur lagt fyrir Alþingi og mælt fyrir nýju frumvarpi um fjarskiptalög, sem gilda eiga um fjarskipti, fjarskiptaþjónustu og fjarskiptanet. Tilgangur frumvarpsins er að stuðla að virkri samkeppni, sem tryggi hag neytenda, atvinnulífsins og þjóðfélagsins í heild.
Við samningu frumvarpsins hefur einkum verið litið til skuldbindinga Íslands gagnvart Evrópska efnahagssvæðinu og nauðsynjar þess að tryggja samtengingu neta, svo að viðskiptavinir ólíkra fjarskiptaneta geti haft samband sín í milli og að fyrirtækjum, sem eiga þjóðbrautina eða fjarskiptanetið og aðra innviði sé gert skylt að opna aðgang að Netinu og annarri aðstöðu á sanngjörnum kjörum.
Það er talið nauðsynlegt að stuðla að raunverulegri samkeppni á markaðinum með því að jafna samkeppnisstöðu fjarskiptafyrirtækja, t.d. með aðgangi að heimtaug og veita
markaðsráðandi fyrirtækjum aðhald, m.a. með bókhaldslegum aðskilnaði.
Væntanleg lög eiga einnig að tryggja að ávallt verði til öflug fjarskiptafyrirtæki á Íslandi og að löggjöf hamli ekki þróun upplýsingatækni og komi í veg fyrir tækniframfarir.
Meðal nýmæla í hinu nýja frumvarpi er númeraflutningur, sem gerir símnotendum unnt að halda símanúmeri sínu án tillits til þess við hvaða símafyrirtæki þeir skipta. Þetta segir í skýringum með frumvarpinu, að sé forsenda fyrir raunverulegri samkeppni í símaþjónustu, en samkvæmt reglum EES ber aðildarríkjum að hafa innleitt númeraflutning eigi síðar en 1. janúar 2000.
Í ræðu sinni á Alþingi, er mælt var fyrir frumvarpinu, sagði ráðherra, að Evrópuríkin hefðu komist að þeirri niðurstöðu, að gömlu símafyrirtækin yrðu ekki brotin upp. Er
það gert til þess að forðast offjárfestingu í dreifikerfinu, flýta fyrir samkeppni og tryggja uppbyggingu fjarskiptakerfa þar sem saman færi ábyrgð á uppbyggingu og þjónustu.
Byltingin í fjarskiptum sem er að verða um þessar mundir er eitt það mikilvægasta, sem er að gerast í atvinnulífi þjóða heims um þessar mundir. Þess vegna er mikilvægt að setja skynsamlegan lagaramma um þennan þátt atvinnulífsins, eins og stefnt er að með frumvarpi ríkisstjórnarinnar.
Heimild: Menntamálaráðuneytið
10.12.99: Bankaviðskipti í gegnum GSM-símann
Opnaður hefur verið svonefndur GSM-banki í samstarfi Landsímans, Sparisjóðs Kópavogs (SPK) og Smartkorta ehf. Um er að ræða nýjung í bankaviðskiptum á Íslandi en viðskiptavinum SPK gefst með GSM-bankanum kostur á að stunda margvísleg bankaviðskipti í gegnum GSM-farsíma.
GSM-bankinn var kynntur á blaðamannafundi hinn 22. nóvember sl.
Bankinn var síðan opnaður formlega þegar forstjóri Landssímans, framkvæmdi fyrstu millifærsluna í GSM-bankanum.
Margvíslegar aðgerðir mögulegar
Í GSM-bankanum er hægt að framkvæma flestar algengustu aðgerðir bankaviðskipta, m.a. hægt að millifæra, greiða gíró- og greiðsluseðla og fá yfirlit yfir stöðu og færslur. Einnig er hægt að fá upplýsingar um gengi gjaldmiðla og vísitölur og fletta upp í símaskrá. Fram kom að mikil áhersla hefði verið lögð á öryggi bankaviðskipta og hvers konar svindl væri því sem næst útilokað.
GSM-bankinn byggist á sérstakri tækni („SIM Toolkit") en í stað venjulegs símakorts er notað sérstakt gagnakort sem gengur í flesta nýlega GSM-síma sem komið hafa á markað á árinu.
Með GSM-bankaviðskiptum er Landssíminn að endurvekja gamalt slagorð fyrirtækisins, „Síminn sparar sporin", en með þeim væri hægt að stunda bankaviðskipti óháð stund og stað. Þó að SPK sé fyrsti bankinn sem tekur upp samstarf um GSM-banka við Símann GSM líður líklega ekki á löngu áður en fleiri bankastofnanir fylgja í kjölfarið.
Heimild: Menntamálaráðuneytið
10.12.99: Menntamálaráðherra mælir fyrir frumvarpi að nýjum útvarpslögum
Menntamálaráðherra hefur mælt fyrir frumvarpi að nýjum útvarpslögum sem er í meginatriðum eins og frumvarp sem lagt var fram á síðasta þingi en var ekki útrætt þá. Nokkrar breytingar hafa þó verið gerðar á frumvarpinu í samræmi við athugasemdir sem menntamálanefnd Alþingis hefur borist um það.
Frumvarpinu er ætlað að mynda almennan ramma um alla útvarpsstarfsemi í landinu, bæði sjónvarp og hljóðvarp, og er það að stofni til byggt á núgildandi útvarpslögum frá 1985. Í frumvarpinu er ekki gert ráð fyrir sérákvæðum um Ríkisútvarpið, eins og nú eru í útvarpslögum, heldur miðað við að um Ríkisútvarpið giltu sérlög.
Ráðherra sagði að hið beina tilefni endurskoðunar útvarpslaga nú væri setning nýrrar tilskipunar Evrópusambandsins en það nýmæli hennar, sem hvað mesta athygli hefur vakið, er heimild fyrir hvert aðildarríki EES til að gera skrá um tiltekna þýðingarmikla viðburði sem senda skal út í dagskrá sem meginhluti almennings hefur aðgang að þótt sjónvarpsstöð sem selur sérstaklega aðgang að efni sínu hafi keypt einkarétt til sýningar frá þessum viðburðum. Mun þessi heimild einkum eiga við um meiri háttar íþróttaviðburði, bæði innlenda og fjölþjóðlega, að því er fram kom í ræðu menntamálaráðherra.
Ráðherra sagði hins vegar að undir núverandi kringumstæðum hefði hann ekki í huga að nýta þessa heimild og rakti hann m.a. að reynsla Dana, sem gert hafa tilraun til að gera slíka skrá, væri sú að erfiðlega gengi að framfylgja þeim.
Rakti ráðherra einnig ummæli sem höfð voru eftir formanni Framsóknarflokksins. Þar sagði hann m.a. að skoða ætti hvort rétt væri að greiða rekstrarkostnað RÚV úr ríkissjóði. Sagði formaðurinn þar jafnframt að gera þyrfti grundvallarbreytingar á stjórnskipulagi Ríkisútvarpsins og losa stofnunina undan því flokkspólitíska stjórnvaldi sem því hefði verið stýrt af.
Þingmaður Vinstrihreyfingar - græns framboðs, sagði að hér hefði menntamálaráðherra flutt mikilvæga pólitíska yfirlýsingu. Hann sagði hana þó hafa verið óljóst orðaða og innti ráðherrann eftir því hvað hann ætti nákvæmlega við.
Ráðherra svaraði því til að vinna þyrfti að því að breyta ákvæðum um Ríkisútvarpið rétt eins og verið væri að breyta hinum almennu útvarpslagaákvæðum. Ekki yrði lengur undan því vikist að vinna að gerð nýs frumvarps um Ríkisútvarpið. „Og ég hef hér áður, oftar en einu sinni í umræðum á Alþingi, reifað þá hugmynd að Ríkisútvarpinu yrði breytt í hlutafélag í eigu ríkisins. Það er ein leið og aðrar leiðir eru einnig fyrir hendi," sagði ráðherra.
Heimild: Menntamálaráðuneytiðð
25.11.99: Edduverðlaunin
Íslensku kvikmynda- og sjónvarpsverðlaunin, Edduverðlaunin, voru veitt í fyrsta sinn hinn 15. nóvember sl. við hátíðlega athöfn í Borgarleikhúsinu.
Kvikmynd Guðnýjar Halldórsdóttur, Úngfrúin góða og húsið, hlaut fimm af þeim ellefu verðlaunum sem veitt voru á Edduverðlaunaveitingunni.
ÚNGFRÚIN hlaut Edduna sem besta kvikmynd ársins, fyrir bestu leikstjórn, bestu leikkonu ársins, bestu förðun og bestu tónlistina. Einnig var myndin valin sem framlag Íslands til forvals Óskarverðlaunanna.
Indriði G. Þorsteinsson hlaut heiðursverðlaun Íslensku kvikmynda- og sjónvarpsakademíunnar fyrir störf eða verk í þágu kvikmyndalistar á Íslandi og var þess getið við afhendingu verðlaunanna að hann hafi verið meðal þeirra sem ruddu braut kvikmyndagerðar á Íslandi.
Einnig var frumkvöðla í íslenskri kvikmyndagerð minnst, sem bjuggu til kvikmyndir áður en segja má að skilyrði til kvikmyndagerðar hafi verið sköpuð og í tilefni 20 ára afmælis Kvikmyndasjóðs Íslands voru sýnd brot úr öllum þeim 57 íslensku
kvikmyndum sem hafa verið gerðar frá því sjóðurinn hóf störf.
Það var mál manna að glæsileiki hafi einkennt hátíðina alla og gestir voru í sínu fínasta pússi eins og siður er á hátíðum af þessu tagi. Var afar létt yfir gestunum sem og þeim sem komu fram, bæði til að afhenda og taka við verðlaunum.
Edduverðlaunin verða árviss viðburður og minnti kynnir hátíðarinnar, á það í lokin að margar stórar og athyglisverðar íslenskar kvikmyndir væru væntanlegar á næstu vikum og mánuðum.
Heimild: Menntamálaráðuneytiðð
Medier i Norden