Mikil áhersla verður lögð á öryggismál og þannig sé dulritun 1024 bita og stuðst við Verisign-vottun, en einnig verði vel fylgst með þróuninni í öryggismálum til að geta brugðist fljótt við nýrri tækni.
Undirtektir fóru fram úr björtustu vonum aðstandenda bankans og urðu reyndar svo góðar að aðaltölva hans lenti í vandræðum fyrsta kvöldið. Kerfið hafði verið þaulprófa miðað við mikið álag, en það varð margfalt meira en von var á og því fór sem fór. Þegar hefur verið bætt úr tækjabúnaði, en einnig þurfti að fjölga fólki verulega til að fara yfir umsóknir sem streyma inn. Það fer ekki á milli mála að Íslendingar eru reiðubúnir fyrir þennan viðskiptamáta, sem líklega á eftir að verða allsráðandi í framtíðinni.
13.10.99: Nordisk Panorama
Norræna stutt- og heimildamyndahátíðin Nordisk Panorama var sett í Reykjavík þann 22. september sl. og stóð til 25. september. Þetta er í tíunda sinn sem hátíðin er haldin.
Dagur Kári Pétursson, kvikmyndaleikstjóri, hlaut fyrstu verðlaun fyrir mynd sína Lost Weekend en alls kepptu fjörutíu stuttmyndir frá Norðurlöndunum á hátíðinni. Dagur Kári er fyrsti Íslendingurinn til að vinna fyrstu verðlaun á Nordisk Panorama
Lost Weekend var lokaverkefni Dags Kára við Kvikmyndaskólann í Kaupmannahöfn en þaðan útskrifaðist hann síðastliðið vor. Þetta eru ekki fyrstu verðlaunin sem Dagur Kári hlýtur fyrir Lost Weekend því myndin hlaut dómnefndarverðlaun á kvikmyndaskólahátíðinni í München og hún var valin besta myndin á stuttmyndahátíð í Mexíkóborg. Auk þess fékk Dagur Kári sérstök verðlaun frönsku sjónvarpsstöðvarinnar Canal+ fyrir stuttmyndina Old Spice.
Önnur verðlaun á hátíðinni féllu í hlut Danans Jons Bang Carlsen fyrir bestu heimildamyndina, Addicted to Solitude, og áhorfendaverðlaunin hlaut norski leikstjórinn Margareth Olin fyrir myndina Dei mjuke hendene.
Ýmsar hliðardagskrár voru á hátíðinni. Í tilefni af tíu ára afmæli hátíðarinnar var sérstök dagskrá undir heitinu "Do you remember? eða "Manstu?" þar sem úrval stuttmynda frá Norðurlöndunum síðustu tíu ár voru sýndar. Einnig voru pallborðsumræður um digital-tækni í kvikmyndagerð og hafði umsjón með þeim danski leikstjórinn Prami Larsen og Maureen Thomas frá Cambridge-háskóla í Bretlandi. Í þessum pallborðsumræðum var reynt að kortleggja stöðuna í kvikmyndagerð í dag, mismunandi leiðir til útgáfu eins og Netið m.a., og hvernig framhaldið verði með tilkomu nýrrar tækni.
Heimild: Menntamálaráðuneyti
13.10.99: Önnur sjónvarpsrás RÚV í athugun
Ríkisútvarpið er með í athugun möguleika á að hefja útsendingar á annarri sjónvarpsrás til viðbótar þeirri sem fyrir er og er nú unnið að úttekt á því hvaða breytingar þurfi að eiga sér stað vegna þess. Vonir standa til að unnt verði að hrinda verkinu í framkvæmd á afmælisári Ríkisútvarpsins þegar stofnunin verði sjötug á næsta ári.
Sjónvarpið er með aðra VHF rás á höfuðborgarsvæðinu en þá sem send er út á og gæti notað hana til útsendingar á dagskrá á því svæði. Reyndar hefði það tíðnisvið áhrif víðar og ef styrkurinn yrði aukinn myndi það kalla á breytingar á sendakerfinu í nokkurri fjarlægð frá höfuðborgarsvæðinu. Ríkisútvarpið hefur haft afnot af rásinni undanfarna áratugi til að fylla upp í holur sem við köllum svo í móttökunni hér á höfuðborgarsvæðinu. Hana er hægt að nota í þessu skyni og eru tæknimenn Ríkissjónvarpsins að gera athuganir á stöðunni.
Útvarpsstjóri hefur sagt að það þyki óhagræði að vera aðeins með eina rás vegna þess dagskrárframboðs sem nútímasjónvarpsstöð þurfi að geta boðið upp á. Séu tæknileg skilyrði til staðar og framkvæmdin innan viðráðanlegra marka fjárhagslega, ætti að ráðast í hana þó að ekki sé hægt að lofa öllum landsmönnum að njóta þeirrar dagskrár þegar í upphafi.
Heimild: Menntamálaráðuneyti
13.10.99: Hlutur innlends sjónvarpsefni fer minnkandi
Í niðurstöðum könnunar á efni íslenskar sjónvarpsstöðva, sem Hagstofa Íslands birtir á næstunni í ritinu Fjölmiðlun og menning, kemur m.a. fram að hlutur innlends efnis hefur farið hlutfallslega minnkandi frá því sjónvarpsútsendingar hófust hér á landi fyrir rúmum þrjátíu árum.
Þrátt fyrir margfalda aukningu á útsendingartíma sjónvarps á hverjum sólarhring frá því sjónvarpsútsendingar hófust hér á landi hefur hlutur innlends efnis staðið í stað eða minnkað frá því sem var í upphafi. Ríkissjónvarpið stendur best að vígi hvað þetta varðar en hlutur innlends efnis er rýr hjá öðrum íslenskum stöðvum. Þá blasir einnig við að uppruni hins erlenda efnis er að stórum hluta bandarískur og sé miðað við efni frá enskumælandi þjóðum annars vegar þá er hlutur annarra þjóða hverfandi.
Ríkissjónvarpið
Frá upphafi sjónvarpsútsendinga hefur hlutfall frétta og efnis á sviði fræðslu, lista, menningar og vísinda farið minnkandi. Hlutfallið segir þó ekki alla söguna því útsendingartíminn á hverjum sólarhring hefur lengst til muna og fróðlegt er að skoða heildarklukkustundafjölda þessara efnisþátta í dagskránni árið 1997 og fyrir nær þremur áratugum. Þannig má sjá að útsendingartími frétta á ári hefur nær tvöfaldast en útsendingartími á fræðslu-, lista-, menningar-, og vísindaefni hefur sáralítið aukist þrátt fyrir rúmlega þrefaldan heildarútsendingartíma.
Íþróttir og efni fyrir börn og unglinga hefur aukist bæði að hlutfalli og útsendingartíma en hlutur kvikmynda og annars leikins efnis hefur því sem næst staðið í stað hlutfallslega og þannig aukist að útsendingartíma. Athyglisvert er að hlutfall auglýsinga hefur haldist svipað frá upphafi. Áherslur í dagskrárstefnu Sjónvarpsins hafa breyst nokkuð frá því í upphafi er Sjónvarpinu var fyrst og fremst ætlað að vera frétta- og fræðslumiðill með áherslu á menningartengt efni.
Afþreyingarhlutverk Sjónvarpsins hefur vaxið af þeim tölum sem hér má sjá. Á þeim þrjátíu árum sem um ræðir hefur hlutverk sjónvarps í daglegu lífi fólks breyst verulega og kröfur þess aukist til sjónvarpsins sem afþreyingar- og skemmtimiðils. Alþjóðlegur sjónvarpsrekstur hefur einnig breyst í þessa veru og dagskrá einstakra sjónvarpsstöðva og rás jafnframt orðið sérhæfðari. Fréttir og menningartengt efni hefur t.a.m. undanfarin ár verið 20-24 af hundraði, þó minnst árið 1997.
Einkareknu stöðvarnar
Afþreyingarhlutverk Stöðvar-2, Sýnar og Stöðvar-3 er hins vegar nokkuð augljóst. Á Stöð-2 er hlutur frétta og fræðslu-, menningar-, lista-, og vísindaefnis um eða innan við tíu af hundraði og á Sýn og Stöð-3 voru þessir efnishlutar ekki fyrir hendi. Segja má að tveimur síðast töldu stöðvunum hafi aldrei verið ætlað að gegna þessu hlutverki, þær voru frá upphafi yfirlýstar afþreyingarstöðvar með nokkra áherslu á íþróttaefni og efni fyrir börn. Sérhæfingin sem áður var minnst á kemur m.a. fram í stofnum slíkra sjónvarpsstöðva á síðustu tveimur árum. Bíórásin, Barnarásin (hætt) og Skjár-1.
Þannig má sjá að stærstur hluti dagskrár þeirra þriggja stöðva, sem könnunin nær til, er lagður undir útsendingar kvikmynda og leikins skemmtiefnis af ýmsum toga. Einnig vekur athygli hversu mjög hlutur auglýsinga í útsendingartíma Stöðvar-2 hefur vaxið á milli ára og var orðinn nær 30 af hundraði árið 1997. Hvað Stöð-2 varðar má benda á að dagskrárstefnan hefur á undanförnum misserum greinilega beinst í þá átt að bjóða upp á vandaðar erlendar kvikmyndir, verðlaunamyndir af ýmsum toga og s.k. listrænar myndir, í bland við afþreyingarefnið.
Íslensk dagskrárgerð á í vök að verjast
Hinu verður ekki móti mælt að innlend dagskrárgerð á í vök að verjast og mætti ætla að sjónvarpsstöðvarnar myndu á næstu árum leggja metnað sinn í að auka hlut hennar í dagskrám sínum. Reyndar verður að geta þess að á síðustu tveimur árum, 1998 og 1999, hefur Ríkissjónvarpið lagt sig nokkuð eftir slíku þótt ekki sé hægt að fullyrða hvort það hafi haft mjög merkjanlega áhrif á hlutföllin í dagskránni.
Heimild: Menntamálaráðuneytið
Medier i Norden